MZUMBE, TAMPERE KUENDESHA UTAFITI KUIMARISHA MAISHA NCHINI

 

CHUO Kikuu Mzumbe kimeanzisha ushirikiano na Chuo Kikuu cha Tampere cha nchini Finland kufanya utafiti utakaosaidia kujenga uwezo na hali bora ya maisha katika kaya nchini Tanzania.

Kaimu Makamu Mkuu wa chuo hicho, Profesa Josephat Itika, alisema ushirikiano huo unalenga kuja na majibu ya kuboresha hali ya maisha ya kaya Tanzania.

Profesa Itika alikuwa akizungumza wakati wa mahafali ya 13 ya chuo hicho mjini Morogoro mwishoni mwa wiki.

“Utafiti huu unalenga kuboresha hali ya maisha ya kaya kutokana na ukweli kwamba kuna tatizo la umasikini katika kaya zetu,”alisema.

Alisema utafiti huo utakuja na mbinu mpya itakayosaidia kuleta ufumbuzi juu ya suala la umasikini katika kaya, ili kuondokana nao.

Inatarajiwa kwamba utakapokamilika, utafiti huo utapelekwa kwa wadau mbalimbali ikiwemo serikali, ili hatua za makusudi ziweze kuchukuliwa.

Alifafanua kwamba kaya zikiwa na maisha mazuri, ni kiashiria kikubwa kwamba vipato vya jamii vimekua na kukua huko hujenga uchumi wa nchi.

Katika miaka ya hivi karibuni, Mzumbe imekuwa ikizidisha ushirikiano na vyuo vya nje, ili kujijengea uwezo katika maeneo ya ufundishaji, utafiti na huduma za ushauri.

Miongoni mwa vyuo ambavyo chuo hicho kimeanzisha ushirikiano ni pamoja na Chuo Kikuu cha London kupitia Idara ya Mafunzo ya ualimu na chuo Kikuu cha CMR Bangalore, India kupitia kampasi ya Dar es Salaam.

Mwenyekiti wa Baraza la Chuo, Profesa Daniel Mkude alisema chuo kimeanza kupata maendeleo makubwa kutokana na ufundishaji wa utumiaji njia ya kietroniki.

Alisema pia wanafunzi wanafundishwa jinsi ya kutumia Teknolojia ya Habari na Mawasiliano (TEHAMA) kujifunza mambo mbalimbali yanayohusu fani zao.

Naye Naibu Makamu Mkuu wa chuo, Utawala na Fedha, Profesa Faustin Kamuzora aliwataka wahitimu hao kuzingatia weledi na maarifa katika utendaji kazi kwenye sekta ya umma au binafsi.

Katika mahafali hayo, jumla ya wahitimu 2125 walitunukiwa; kati ya hao, wanawake wakiwa 922 na wanaume 1174.

Chanzo;Tanzania Daima

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.