JAMII YAASWA KUACHA IMANI POTOFU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

JAMII imetakiwa kuacha imani potofu na kutoa ushirikiano kikamilifu katika ukusanyaji wa takwimu kwa kila kaya nchini ili kuwezesha Serikali kupanga mipango mbalimbali ya maendeleo katika kuboresha huduma na sera ili kuwa na maamuzi yanayotekelezeka.

Rai hiyo, imetolewa na Naibu Waziri wa Fedha na Uchumi, (Sera), Mwigulu Nchemba, mwishoni mwa wiki wakati akifungua mafunzo ya wasimamizi na wadadisi wa kufuatilia hali ya umaskini katika kila kaya Tanzania, yaliyoandaliwa na Ofisi ya Taifa ya Takwimu (NBS).

Nchemba, alisema imani potofu na za kizamani za jamii, zinaweza kufanya shughuli za maendeleo kurudi nyuma ikiwemo kupanga mipango muhimu.

Alisema kuwa, ikiwa wataendekeza imani hizo na kushindwa kutoa taarifa sahihi za kitakwimu, watasababisha mipango ya maendeleo ikiwemo ujenzi wa shule, zahanati na masoko kutojengwa kulingana na idadi ya watu katika maeneo yao na kuwafanya kuanza kuhoji kulikoni.

Aidha, alisema wizara hiyo itaendelea na juhudi ya kuiwezesha kifedha Ofisi ya NBS, ili iweze kuendelea na jukumu lake la kufikisha matokeo ya tafiti zinazofanyika katika ngazi zote za utawala.

Akielezea kuhusu Utafiti wa Mapato na Matumizi ya Kaya Binafsi wa mwaka 2011/2012, alisema umaskini wa chakula umepungua kutoka asilimia 11.8 mwaka 2007 na kufikia asilimia 9.7 mwaka 2011/2012 wakati ule wa kipato umetoka asilimia 34.4 mwaka 2007 na kufikia asilimia 28.2 2011/2012.

Alibainisha kuwa, matokeo hayo ni jambo la kujivunia kuona kwamba, juhudi  za Serikali zimefanikisha kufikia lengo la kupunguza umaskini uliokithiri, yaani umaskini wa chakula kama ilivyoainishwa kwenye Mkukuta I na II.

Hata hivyo, alisema lengo la kupunguza umaskini wa chakula lilikuwa kufikia asilimia 12.9 ifikapo 2015 na matokeo yanaonyesha kuwa, Serikali imevuka lengo hilo miaka mitatu kabla kwa kufikia asilimia 9.7.

Awali, Mkurugenzi Mkuu wa NBS, Dk. Albina Chuwa, alisema wasimamizi na wadadisi 65 wa ofisi hiyo kutoka mikoa mbalimbali ya Tanzania Bara na Zanzibar, wanapatiwa mafunzo ya wiki tatu kuhusu namna ya kukusanya takwimu zinazohusiana na utafiti wa kufuatilia hali ya umaskini katika Kaya Tanzania.

Alisema mafunzo hayo ni ya awamu ya nne na wale watakaofaulu watashiriki katika zoezi hilo ambalo linategemewa kuanza Oktoba mosi mwaka huu na kuendelea kwa kipindi cha mwaka mmoja.

Hata hivyo, alisema madososo ya utafiti huo, pia utakusanya taarifa za sekta nyingine muhimu ambazo zinaweza kuchambuliwa kwa kuhusishwa na hali ya umaskini.

Dk. Chuwa, alizitaja sekta hizo kuwa ni kilimo, uvuvi, mifugo, afya, ajira na upatikanaji wa huduma mbalimbali katika kaya.

Chanzo:Tanzania Daima