MGANGA MKUU KITUO CHA AFYA MTIMBIRA APONGEZWA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

  Ujenzi wa korido ya Kituo cha Afya Mtimbira ukiendelea.

 Moja ya jengo lililojengwa katika Kituo cha AfyaMtimbira likiwa katika hatua za mwisho za umaliziaji.

Mwonekano wa baadhi ya wodi zilizofanyiwa ukarabati katika Kituo cha Afya Mtimbira.

Na. Mwandishi wetu Malinyi

Mkurugenzi Mtendaji  wa Halmashauri ya Wilaya ya Malinyi Marceline Ndimbwa amempongeza Mganga Mkuu wa Kituo cha Afya Mtimbira kwa kusimamia vizuri ujenzi na ukarabati wa Kituo cha Afya Mtimbira.

Aliyasema hayo wakati wa ziara yake ya kukagua ukarabati na ujenzi unaoendelea katika Kituo hicho cha Afya lengo likiwa ni kujiridhisha na kazi zinazofanyika katika kituo hicho.

Akiongea kituoni hapo Ndimbwa alisema kazi nzuri imefanyika kutokana na mwonekano wa baadhi ya majengo yaliyokamilika ambayo yanaendana na fedha iliyotolewa lakini pia usimamizi mzuri wa Mganga Mkuu wa kituo na timu yake.

Aliongeza kuwa serikali imetoa fedha kwa ajili ya ukarabati wa Kituo hicho hivyo ni jukumu la wananchi na viongozi wote kusimamia ujenzi huo na kuhakikisha kuwa unakamilika kwa wakati ili wananchi wapate huduma bora za Afya.

Aidha alisema kuwa fedha zilizotolewa ni kwa ajili ya ukarabati wa majengo yote ya zamani ambayo yameshakamilika kukarabatiwa na ujenzi wa majengo mapya sita katika kituo hicho unaendelea ikiwemo jengo la upasuaji, wodi ya kinamama, chumba cha kuhifadhia maiti, maabara, wodi ya wanaume na kujenga kichomeataka.

Hata hivyo wananchi kwa pamoja walijitolea nguvu zao kwa kuchangia kiasi cha shilingi milioni kumi na saba ikiwa ni kuunga mkono jitihada zilizofanywa na serikali kwa kuwaboreshea huduma za Afya.

Kituo cha Afya Mtimbira ni moja ya vituo vilivyopata fedha kutoka Serikalini ambapo jumla ya shilingi milioni mia tano zimetolewa kwa ajili ya kuboresha kituo hicho kwa kukarabati majengo ya zamani na kujenga majengo mapya.