WALILIA KUMWONA RAIS KIKWETE MORO

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

BAADA ya juhudi za wakulima 300 wa Mgulu wa ndege Manispaa Morogoro kushindwa kupenyeza hoja ya dhuruma ya ardhi kwa Rais Jakaya Kikwete mwishoni mwa wiki, wanakusudia kumfuata kwenye ziara atakayofanya leo mkoani hapa.

Wakizungumza na Tanzania Daima jana Zaolo Mkude na Betrice Zacharia walisema uamuzi wa kuufuata msafara huo ni kuhakikisha madai yao yanafika kwa rais baada ya kupuuzwa na mamlaka za chini.

“Sisi ni waathirika wa ardhi ile kisheria maana tuliishi hapo kwa miaka 30 kabla manispaa haijaja kupima kwa mabavu na kutufukuza… tutamfuata wilaya nyingine tukamkabidhi madai yetu,” alisema Betrice.

Walisema mgogoro huo wa muda mrefu unatokana na ubinafsi wa watendaji wa manispaa kutowalipa fidia, kupuuza zuio la Mahakama, kuendelea kugawa kwa nguvu maeneo yao, kutishia kuwafunga na kupigwa mabomu kwa kisingizio cha kuhatarisha amani.

“Ukweli ziara hii tulitegemea kupata jibu la moja kwa moja kwa rais Kikwete juu ya hatima ya maeneo yetu ya Mgulu wa ndege kama angetoa nafsi kumweleza kero zetu.

“Tunaomba tueleweke kuwa hatupingani na maendeleo… shida hapa ni haki yetu juu ya ardhi tunayotakiwa kuiachia,” alifafanua Mkude.

Akihitimisha kwa awamu ya kwaza ziara yake mkoani Morogoro katika uwanja wa Jamuhuri, rais Kikwete hakuridhishwa na utendaji wa serikali mkoani hapa akisema umejaa uzembe na uoga katika kusimamia na kutekeleza shughuli za maendeleo

Chanzo;Tanzania Daima