Wanakijiji waziangukia asasi za kiraia

WANAKIJIJI wa kijiji cha Mandela-Magole, wilayani Kilosa, wameziomba asasi za kiraia mkoani Morogoro kumshawishi Rais Jakaya Kikwete kutengua maamuzi ya baraza la madiwani kuwapa wafugaji mashamba sita yenye ukubwa wa ekari 2,509 ili kuwanusuru na mapigano.

Wakiungwa mkono na mwenyekiti wa kijiji hicho, Kilimo Njagila, wananchi hao waliulaumu uongozi wa halmashauri ya wilaya hiyo kwa kuidhinisha kinyemela mashamba hayo yaliyokuwa ya Mkonge baadaye Chubuku kwa wafugaji na kampuni ya ununuzi wa Tumbaku Dimon wakati kunahitaji kubwa la ardhi kutokana na ongezeko la watu.

“Mchakato wa kuidai ardhi hii ulishaanza tangu mwaka 2000 hadi 2012 tukawa tumefanikiwa Rais kuyafutia umiliki, kilichotukwamisha kugawana ni barua ya kuturuhusu kuendelea na shuguli zetu…tumefuatilia hadi wizara ya ardhi majibu ni kuwa tusubiri itakuja na sasa ni mwezi wa 12 hatujapata jibu,” alifafanua Mwenyekiti Njagila katika mafunzo ya sheria za ardhi yaliyoandaliwa na taasisi ya elimu na asasi ya maendeleo ya elimu na maarifa ya ‘Greenbelt schools Trust Fund (GSTF) ya mjini Morogoro.

Akinukuu baadhi ya barua za mchakato huo ikiwemo ya Mkurugenzi wilaya kwa Kamishina wa Ardhi ya Juni 31, mwaka 2012 kumbu KDC/L.10/4/VOL.III/4 na barua ya Septemba 18, mwaka 2012 kumbu KDC/L.10/4/22 majibu yake ya Agosti 28 kumbu LD/30305/102 na Desemba 3, mwaka 2012 kumbu KL/MAG/145 alisema halmashauri kupitia baraza la madiwani liliingilia mamlaka ya kijiji hicho na kugawa mashamba hayo kinyume na sheria 1999 na 2005.

“Kama inavyoonyesha barua hii ya Mkurugenzi ya Oktoba 31, mwaka 2012 kwenda kwa Kamishna wa Ardhi kumbu KL/MAG/141 limetajwa shamba namba 35 (ekari 519), 36 (ekari 505), 37(ekari 503), 38(ekari 476), 40(ekari 256) na 40A (ekari 250)…eneo hili linaweza kutosheleza mahitaji ya wananchi,”alifafanua Mwenyekiti huyo.

Akijibu madai hayo, Katbu wa GSTF, John Mengele aliwataka wanachi na viongozi kutumia elimu wanayoipata kutatua changamoto zinazowakabili hususani katika maeneo yenye migogoro ya ardhi.

“Hatukuja kuwachonganisha kati yenu na jamii mnazoishi isipokuwa tunawapa mwanga wa kutumia katika utatuzi wa changamoto zinazowazunguka, kumbukeni elimu kama hii ni ghali kuipata hivyo ni vema mkaitumia kwa usahihi katika kuzikabili changamoto,” alifafanua Mengele

Chanzo;Tanzania Daima